بۇگىن شىمكەنتتەگى «كورمە» ورتالىعىندا « ۇلى دالا كىلەمدەرى» اتتى بەس كۇندىك كىلەمدەر جارمەڭكەسى اشىلدى.
كورمەنى تاماشالاۋعا وڭتۇستىك قازاقستان وبلىسىنىڭ اكىمى ج.تۇيمەباەۆ جانە وبلىسىمىزعا ارنايى جۇمىس ساپارىمەن كەلگەن يران يسلام رەسپۋبليكاسىنىڭ حوراسان رازاۆي پروۆينتسياسىنىڭ گۋبەرناتورى باستاعان دەلەگاتسيا كەلدى.
كورمەنىڭ اشىلۋ سالتاناتىندا ءسوز العان ايماق باسشىسى قازاقستانداعى ەڭ ءىرى «بال تەكستيل» وتاندىق كىلەم ءوندىرۋشى فابريكاسى ەلباسىنىڭ باستاماسىمەن قۇرىلعان «وڭتۇستىك» ارنايى ەكونوميكالىق ايماعىندا جۇزەگە اسىرىلعانىن اتاپ ءوتتى.
«رەسپۋبليكاداعى ءىرى كىلەم زاۋىتى توقىما سالاسىنا قوسار ۇلەسى مول. بۇگىندە فابريكا ايرىقشا ويۋ-ورنەكتەرمەن ارلەنگەن, وتاندىق كىلەمنىڭ 2000-نان استام تۇرلەرىن وبلىس تۇرعىندارىنا ۇسىنۋدا. جوبانىڭ سەرىكتەسى - الەمدەگى ەڭ ءىرى 5 كىلەم وندىرۋشىلەردىڭ ءبىرى بولىپ تابىلاتىن جانە الەمدىك نارىقتا 20 جىلدان استام تاجىريبەسى بار «Kartal Hali» (تۇركيا) كومپانياسى», - دەدى اكىم.
شىمكەنتتە ەكىنشى رەت ۇيىمداستىرىلىپ وتىرعان كورمەنى ەلىمىزدەگى ءىرى كىلەم شىعارۋشى «بال تەكستيل» فابريكاسى ۇيىمداستىردى. جارمەڭكەدە قوناقتاردىڭ نازارىنا 1 مىڭنان استام كىلەمدەر مەن ونىڭ تۇرلەرى ۇسىنىلۋدا. شارا اياسىندا ارزانداتىلعان باعادا كىلەم تۇرلەرىن ساتىپ الۋعا بولادى.
ايتا كەتەيىك, وندىرىستىك قۋاتى جىلىنا 5 ملن. شارشى مەتر كىلەم توقۋعا قاۋقارلى فابريكا ىسكە قوسىلعان 2013 جىلدان بەرى 9 ملن شارشى مەترگە جۋىق كىلەم توقىسا, وسى ارالىقتا 6 ملن. كەلى بولاتىن پروپيلەن ءجىبىن يىرگەن.